ljóð handa manni með þýskt eftirnafn og konu sem yrkir fiðrildaljóð
einu sinni skrifaði til mín maður
og orðin voru rauð en stafirnir svartir
og þeim var hvíslað
á hvítan grunn og tónninn
var ertandi og þegar ég las orðin hans
varð ég heit og mig kitlaði og ég vissi að hann
hefði glott meðan hann skrifaði
það stóð ertu ljóðskáld? ljóðskáld
eins og elísabet jökuls? það er sexí
ég flissaði og velti því fyrir mér hvort
hann héldi kannski að ég og elísabet jökuls
værum einu ljóðskáldin
hann var alltaf að stríða mér