Í álögum
?Faðir minn átti fagurt land?,
fyrir það er ég hrelldur.
Nú er það grafið í svalan sæ.
Seiðurinn veldur,
seiðurinn þessu veldur.

Köld eru norna reiðiráð.
Rammt hefur stjúpa galið,
flögra ég um eins og hræfús hrafn.
Hefur mig kalið,
hefur á fótum kalið.

Þó eru óbreytt augun mín,
en álagagervið blekkir.
Það eitt getur bætt um ósköpin,
ef einhver þekkir,
ef einhver svipinn þekkir.

En enginn kannast við augun mín,
í álögum má ég þreyja
og seinast á hjarni hælislaus
í haminum deyja,
í haminum mínum deyja.  
Jóhann Gunnar Sigurðsson
1882 - 1906


Ljóð eftir Jóhann Gunnar Sigurðsson

Kvöldbæn
Kvak
Undir seglum (Kveðið í veikindum)
Ad meam stellam - puellam
Þökk
Kveðið í gljúfrum
Í val
Óráð
Í álögum
Fyrir dauðans dyrum
Vísa
Hríð