Ljóð.is

Hvað er frelsi?

Hvað er það að vera frjáls?
hvíslar fuglinn
að svíninu

frelsi er það
að fá að lifa
svarar svínið

Hvað er það að vera frjáls?
hvíslar fuglinn
að hundinum

frelsi er það
að fá að borða
svarar hundurinn

Hvað er það að vera frjáls
hvíslar fuglinn
að kettinum

frelsi er það
að fá að sofa
svarar kötturinn

Hvað er það að vera frjáls
hvíslar fuglinn
að manninum

frelsi er það
að eiga allt sem
að hugurinn girnist
svarar maðurinn.

Fuglinn flýgur á brott
eignarlaus, eilítið svangur
örþreyttur
lifandi
og frjáls.

Sigurgeir Vilmundarson
1972 - ...

Hvað er það að vera frjáls?