Í þúsund ár.
Boðskap drottins víst sér völdu,
virtu í öllu þjóðar hag,
vopnin bitur fljótt þeir földu,
friðinn héldu þennan dag.
Þorgeir goði kaus þar krossinn,
kynnti lögin snjöllum róm,
sínum goðum fleygði í fossinn,
fól í elfu heiðindóm.
Kirkja Drottins, þú sem þekkir
þúsund ára gönguferð,
þöglir muna þínir bekkir
þjóð sem deildi smáum verð.
Löngum þó að mistök manna
marki spor á hreinan skjöld,
blessun veitti sífellt sanna,
sárin græddi á hverri öld.
Kirkja drottins, ár og aldir
örugg reis sem bjarg á jörð,
orðið heilagt ótrauð valdir
alltaf þinni breysku hjörð.
Friðarboðskap Krists þú kenndir,
kveiktir trú í hjarta manns,
ávallt fyrr og enn þú bendir
öllum leið til frelsarans.
Kirkja drottins, hrelldum, hrjáðum,
huggun ert í hverri raun,
og af kærleik öllum smáðum
ávalt boðar sigurlaun.
Vertu stöðugt ár og aldir,
athvarf þess sem veikur fer
svo þú sterk og staðföst haldir
stöðu guðs á jörðu hér.
Ljóðið fékk 1. verðlaun í ljóðasakeppni á krisnihátíð
árið 2000.
árið 2000.